تخاريف

بكرا الجمعة مفيش حاجه اتفرج عليها اي فيلم مسرحية اي حاجه، العيال نامت، والكابتشينو لسه  سخن، عايزه اقوم اغلي مياه، صوت العياط لايفارق وداني ،عادل جابلي ورده، بقيت باكل بسرعة البرق زي بيبا ، البت مشيره الندالة عنونها، ماما في الساحل وانا بكرا لوحدي ، البت الي بتجيلي كل يوم اقولها اغسلي ايدك قبل ما تمسكي العيال تقولي انا متوضيا قبل مانزل ، الوضوء حلو مفيش كلام، الكابتشينو برد، صاحب السعاده خلصت اتفرج على ايه، عادل بيسألني انتي متابعه موضوع كاباين المنتره ، اجبرني على الضحك وانا مفيسة، الليفينج روم شبه دريم بارك، لولوس وسيف كبروا اوي مشاء الله، بابا لو شاف الي انا كتباه حيقول عليه بيبي قطط ، عادل لقى نفسه في جروب مدرسته وفاتح الصفحة وهتيا كتابه، عبدالرحمن جاه خد مني ١٠٠ جينه، يااااااي بكرا ارب ايدول، اخر رشفة من الكابتشينو، هو ايه موضوع رينيه زيلوجر ؟ عادل جابلي ورده، ابن الجيران اسمه سليم رمى فلوس جده من الشباك، اعلان فريسكا بتاع دييجو والفخاد  ف(&&&$ ، ذات مومنت لما تسمعي صوت حد من العيال بيعيط تقومي فازة من مكانك بس يتطلع سليم ابن الجيران، الواد ده منمش ليه ، وانا مالي، عادل حيكسر الكيبورد من الكتابه اكيد سياسة ، الواد فرفر وحشني اوي ، ذهب الليل وطلع الفجر والعصفور صوصو ، هو ليه بس شيليز الي عنده ريفل في المشروبات؟؟ نفسي في جيلي ببسكوت ماري، بكرا عمله تورلي، عايزه اطلع اللحمة، عادل جابلي ورده، هو احنا حنشتي امتى، عايزه اشوف الجزيرة ٢ ، الله يرحمك ياخالد صالح، هو صحيح اخو اسمه انسان؟ انيبيلا هلال بتاعة ارب ايدول عامله زي الافاتار، البوفتيك النهارده كان حلو ، ميمي عندها برد جامد، عايزه اعمل هاي شير في المطبخ، ياترى بكرا حيصحولي الساعه كام؟ عادل جابلي وردة ، عايزه اجيب اي باد ، شهر ٤ الي جاي حيبقى بقالي ٥ سنين متجوزه، احمدوي خطى اول خطوة اخيرا، هي فيروزه في حريم سلطان هويام حتقتلها ولا حتلاقي مصرعها ازاي؟ عادل جاب لاب توب جديد والله الف مبروك، النهار كان طويل اوي ، هيلدا في ستار اكاديمي اكيد  بتشرب اكسير الشباب كل يوم الصبح، امتى حقوم انام، يوه لسه حغلي مياه نفسي اخلع يوم واروح اروق نفسي في اي سبا، عايزه ابطل افكر والاصوات الي في راسي توطى صوتها شوية يأما تعمل ميوت وتتركني في سلام ، عادل جابلي وردة طب مجبش بوكيه ليه؟ تصبحوا على خير ،