اليزيدية

انتشرت الايام الي فاتت حوار البنت اليزيدية الي قابلت السيسي، وطبعا لجهلي الشديد كنت فاكرة ان اليزيدية بلد في العراق زيهم زي الاكراد كده، هما صحيح اكراد بس مش بيحبوه ان يطلق عليهم انهم كرديين بل يعتزون انهم يزيديين، الي هي ديانه.

هما موحدين بالله الحمدالله، وعارفين ان فيه حساب، ويوم قيامة، وبيحجوا، ويصموا ويصلوا ويتجوزوا، وكتاب مقدس، ومكان مقدس، وطائر مقدس، ايون طائر.

كنت اتمنى اني الاقي معلومات في كتاب اسلام بلا مذاهب لدكتور مصطفى الشكعة، لكن اليزيدية لم تكن في كتابه. اهم ما لفت انتباهي في هذه الديانه بعد الدقيق والتمحيص في كل المواقع، والدخول على مواقع خاصة بهم، وصفحات السوشيال ميديا التي تمثلهم، وايضا انتقلت لبروفايلات يزيديين في العراق، واكتشفت الاتي وبرده الله واعلم،  بس حبيت ان اشاركم بالمعلومات دي:

- 80% منهم في العراق غرب الموصل في مدينة سنجار،وشمال الموصل حول وادي لالش.
- اصل ديانتهم تعود الي قبل ظهور كل الاديان حسب معتقداتهم، حيث يعتقدون انهم ابناء ادم فقط دون حواء (حاولت اعرف ازاي فكرهم وصلهم لكده اتصدمت: ادم وحواء اختلفوا، كل واحد حط شهوته في اناء، بعد فترة حواء فتحت لقت دوود، وادم فتح لقى طفل حي سماه شيث ، بالثاء، هل هو هو شيت بالتاء الله واعلم)
- طاووس ملك، يمثل ابليس، حيث في اعتقادهم ان الله حين امر الملائكة بالسجود لادم، وسجدوا ، ورفض ابليس السجود فقد فاز، لان الله قد امرهم من قبل ان لايسجدوا الا لوجه الكريم وذلك كان اختبار للملائكة.
- الشمس قبلتهم للصلاة، خمس صلوات برده، من الشروق للمغرب.
- معبدهم المقدس هو معبد لالش، بيت قديس عندهم اسمه الشيخ عدي بن مسافر الاموي، يوم 10 ذو الحجة بيتوجهوا للحج وقبلتهم مش الي الكبعة، لأ، الي معبد لالش، بيقفوا على عرفات برده بس في وادي لالش ، وبيشربوا برده من زمزم الي في الوادي.
- الشيخ عدي بن مسافر الاموي، نسله من مروان بن حكم الاموي، ودي دلالة انهم مرتبطيين بالامويين، وخصوصا القصة الي بتقول ان هذا الدين ظهر بعد موت يزيد بن معاوية، وان هناك العديد الذين تأثروا به، وكانوا بيزعلوا من السب واللعن الي كان بيتوجهلوا، فأنشقوا عن الاسلام وتكونت اليزيدية. لكن هما بيرفضوا هذه الرواية شكلا ومضمونا.
- كتابهم المقدس، الجلوة 3 صفحات فيها تعاليم عن صفات الله عز وجل، ومصحف رش (او الكتاب الاسود)، بيقولوا 7 صفحات، وبيقولوا برده انه غير مدون وانه محفوظ شفويا، يعتبر كتاب تاريخي حسب ما استفهمت، يضم معلومات خلق الكون والملائكة، وتاريخ اليزيدية وعقائدهم. الكتابين دول للروائي الشيخ عدي بن مسافر الاموي.
- الشهادة لديهم هي:اشهد واحد الله، سلطان يزيد حبيب الله
- يؤمنون بالاستنساخ اي ان لما حد يموت روحه بتدخل في مولود جديد.
- يوم القيامة مكانه سوف يكون في قرية ماطط في سنجار جمبهم يعني مش حيروحوا بعيد، موازينهم حتبقى في ايد الشيخ عدي الي حيحاسبهم وياخدهم ويدخلوا الجنه.
- الزكاه تجمع ثلاث مرات في السنة، القائميين على جمعها هو القوالون ( طائفة التي تحتفظ باخر تمثال لطاووس ملك)، حيث ان في
قديم الزمان هناك 7 تماثيل او سناجق زي ما مكتوب،  بيخدوا السنجق الطاووسي ده ويدوروا بيه يجمعوا الزكاه.
- الصيام: في اربعين يوم بيصموهم مش عارفه ليه، بس الغريب ان كل من اسمه إلياس في صيام له مخصوص بيصومه.
- من المحرمات اللون الازرق، حرف الشين والطاء، السب واللعن، حلق الشنب، والكرنب. فيه محرمات كتيرة بس دول الي شدوا انتباهي.
- اليزيدي الي يحضن رضيع اثناء طهوره، بيبقى اخوه امه. زي god father يعني.
- مفيش حد يقدر يدخل ديانتهم، مكتفيين بعددهم الي بيترواح بين 700,000 الى 800,000
- منقسمين الي 3 طبقات حسب hierarchy الي حطه الشيخ عدي وهو: طبقة شيخ، دي الطبق الايليت الي كانت حولين الشيخ عدي، طبقة البير: برده من الايليت، بينحدروا من بير علاء احد اصدقاء الشيخ عدي، طبقة المريد: الي مش شيخ ولا بير يبقى مريد.
- ممنوع التزاوج بين هذه الطبقات، الي عايز يتجوز يتجوز من طبقته.
- معظم المواقع التاريخية، توصف اليزيدية بعبدة الشيطان، ولكن لم اجد ماهو يدل على ذلك من ناحية الطقوس. فمثل هذ الوصف يتطلب دماغ تانية خالص مش حج وعرفات. رأي الخاص انها مشتقة من الشيعة. مع كامل الاحترام لرأيكم.