السواريه ما بين الحشمة والأحيه

"ملابس سواريه متنوعة تركي ولبناني اصلي للبيع، منها القصير والطويل ، ويوجد مقاسات عادية، ومقاسات خاصة ومقاسات كبيرة"

ده كان اعلان على الويب، على منتدى اسمه "صندوق دوت كوم" قسم الازياء والملابس، الملفت في الاعلان  كلمة تركي ولبناني، شغل ماركتيج على اعلى مستوى، لان كلمة تركي ولبناني كافية انها تزغلل عين اي واحدة فتتصور انها ممكن تلاقي عند صاحب الاعلان فستان إليسا إلي كانت لبسته في اخر كليبة، او فستان سمر الي كانت لبسته لما خرجت تقابل مهند من ورا جوزها عدنان. 

 ومن الاعلانات إلي استوقفتني برده  " فستان سواريه بمبي جديد لم يستخدم اطلاقا سمبل اوي وارد امريكا من اتيليه معروف"، لو حللنا الاعلان زي ما السادة مذعيين الكورة لما يحللوا، وخلينا ناخد الكابتن شالبوزة (مدحت شلبي) كمثل، اكيد حيوضح ويفسر ويحلل الاسباب الحقيقة ورا الاعلان ده ويقول "مساء الانوار عليكم جميعا، خلونا نتكلم عن حدث مهم مهم مهم،  اعلان على النت، اكيد اكيد اكيد بتسأله اعلان ايه ده، لتاني مرة اهو بقول اعلان على النت، نزل ال – ي- م، بيقولك ايه الاعلان ياسيدي، بيقول فستان سواريه .... اله اله اله ... لا مش معقول ولونه بمبى ايه الحلاوة دي، ده لوني المفضل يا نصر (المقصود محمد نصر مخرج برنامج مساء الانوار لو محدش عارف)، جديد ولم يستخدم بعد، انا شايف وبكل ش-ف-ا-فية ان الكلام ده مضبوط ميه الميه، بس السؤال إلي بيطرح نفسه مدام الفستان سواريه وجديد ولم يستخدم وكمان بمبي ليه ملبستيهوشي الهههه ده كلام، ده لسه كمان مخرج البرنامج الجميل بيقولي انه من امريكا وكمان سمبل اوي معقول الكلام ده ينفع كده برده، خسارة خسارة خسارة حاجة بالجمال ده والزوق ده تتباع كده من غير ما نعرف السبب، وان عرف السبب بطل العجب، فااااااصل ونننننرجع تاني"

بس على فكرة انا مش جاية اتكلم عن الاعلانات إلي على المنتديات ولا عن مذعيين الكورة، انا عايزة اتكلم عن السورايه، وبتسأل هو السواريه حصله ايه، احب ابشركم ان السواريه بينه وبين تغطية العورة فقط خطوة واحدة، يعني احنا بدل ما نتقدم لقدام بنرجع لورا، او ممكن نقول ان زي ما موضة البنطلون الاسترتش رجعت موضة تاني في اسم جديد وهو "لاجينج" يبقى اكيد مفيش مانع ترجع موضة ورق الشجر، ولو رجعت اكيد حترجع في اسم  " ليف توب" او "ليف بنتز" او " ليف دريس" والاخير ده حيبقى في نفس الوقت "ليف بيكيني".

انا مش بهزر على فكرة،  اصل إلي الواحد بيشوفه فى المناسبات السعيدة زي الخطوبات وحفلات الزفاف، شئ لا يصدقه عقل ياجدعان، تلاقي البت داخلة اجدعها قاعة اكنها الرقاصة، انا ممكن التمس ليها العذر لو هي سينجل عايزة تلفت نظر حد كذه ولا كذه، فبتبقى مضطرة تشلح من فوق ومن تحت، بس برده اوفر اوي دي لو حاجه وقعت منها وقررت تجبها تبقى كارثة في حاجات فوق حتبان وتحت كمان.

بس الي معاها خطيب ولا جوز وداخلة فرح كده، ايه ياشيخة .... ايه ياشيخه، دي بقى اكيد علامات الساعة، ماهو مش معقول يكون الراجل شايف الست الي معاه نازله بالمنظر ده ويسبها تبهر عيون رجالة غيره، سامعة واحدة بتقولي مش كل الرجالة بتبص (طبعا هي تقصد "بمش كل" جوزها فقط)، احب اقولك انا مفيش رجل مش بيبص، الراجل اول مايوصل الفرح او المناسبة الي رايحها بيشغل خاصية البص، في بصة اكنه سرحان، وبصه من تحت لتحت، وفي نوع خبيث من الرجال  لو لمح حاجه مشلحة معدية يروح مخبط على مراته او خطبته عشان تبص وبكده لايلام على البص، واخيرا البصة التي يمكن ان تتسبب في ليلة سودا على دماغ الرجل وهي عندما تتفتح قرون الاستشعار عند قرينته وتراه وهو يستخدم خاصية البص.

سبونا من الراجل الي بيبص، خلونا مع قليل الحيلة، تكنش فاكر نفسك اجنبي ولاعايش في بلد اروبي، مش عارفة افسر موقفك، ازاي تسبها كده، طب اقولها حاجه، حط اي "رولز" تحد من العري ده، انا ممكن اساعدك، قولها لو الفستان قصير لازم يبقى بكم او نص كم، وان اقصر فستان تتقبله هو تحت الركبه، خليك حمش متخافش يا ولدي، إلي بيخخخخاف يروح، ممكن تقولها كمان انها لو لبست فستان طويل ممكن يبقى "سون برتل" بس كده كده لازم تحط شال، اوعى تخاف، هي مش اتجوزت عايزه تعري ليه بقى.

 ولو زرجنت احلف عليها بالطلاق لو الحكم الامر، وفهمها ان كلامك هو الي حيمشى، ولو معاجبهاش الكلام، وشغلت اسطوانة انا كنت بلبس كده قبل ما اعرفك، دادي مكنش بيقول حاجه على لبس السواريه بتاعي، مانا مرة رحت معاك فرح صاحبك فوزي بالفستان ده، اوعى تلعب في عقلك اثبت على موقفك انت عايز تبقى افا ولا ايه، ولا عايز الناس تقول عليك جوز الست، لو الحوار اشتد وفتحت الحنفية قول الجملة السحرية دي " انا مودي اتقلب خلاص ومليش نفس انزل" مش بعيد تلاقيها قامت لبست بنطلون تحت الفستان وبوليره.

ده الواحد بيشوف عجائب الدنيا السبع في المناسبات دي، ده لو عبدالحليم حافظ كان موجود كان عمل فيلم " البنات والسواريه"، والاستاذ قاسم امين نصير المراءة كان عمل حاجتين اولاَ كانت مؤلفاته في تحرير المراءة زادت واحد، وكان كتب الجزء الثاني من " المراءة الجديدة" وسماه "المراءة الخليغة"، وثانياَ كان اكيد حيتراجع عن فكرة تحرير المراءة وكان حيقول" الحرية ليست حرية ملبس، بل حرية فكر، فالجسد العاري ان دل على شئ فهو الفكر العاري"