صباح يوم السبت الموافق 26-4-1986 شهد العالم اكبر كارثة نووية وهي كارثة تشيرنوبل،مأساة حقيقية عاشها سكان مقاطعة كييف في اوكرانيا ، انقطاع للتيار الكهرباء وجميع موارد الطاقة، تعطل في المصانع، وخسارات مالية تقدر بالمليارات، وبالطبع راح في الرجلين 36 واحد من زينة شباب كييف، ده غير اصابة 2000 شخص يعني الدنيا يوميها انقلبت رأسا على عقب، زي الي حصلي بعديها بيومين بالضبط 28-4-1986، بعد ما كنت الكل في الكل، ومفيش غيري على الحجر، دلوعة ماما وبابا، اول ما رأت العين، كل ده في اليوم ده اصبح "مبلاش نتكلم في الماضي....ده الماضي ده كان كله جراح".
كائن اقرع الشعر اجرودي، اولى انجازته في عالمنا اطلاق سائل البيبي على احدى الممرضات الفرنسيات.عمر عبدالعزيز محمود، الم تكتفوا بي يا أبي ويا أمي، الم أملئ عالمكم، ولا هي رغبة الاهالي المصرية انهم لازم يجيبوا الواد، مجتمع ذكوري فعلا.
انا لااتذكر شيئ ، لكن كانت هناك اساطير تروى لي، واولى هذه الاساطير ان هذا الكائن عنيد من يومه، جهاز السرينة مركب في اخر حلقه وهتيا عياط واللغاليغ رايحه جايه. الرضاعة لدى هذا الكائن بمواعيد محددة وليس عشوائي، واذا دون قصد تاخرت امي في اعداد البزازة (ايوه احنا بقول عليها بزازة يا امل)، يتم رفضها لمجرد التأخير- هو كان جي يربيكوا ولا ايه؟؟؟؟- عيل غتت، بي اس: الوضع مستمر حتى الان.
بالطبع كان هناك عدة محاولات للتخلص منه، اولها وهما لسه على البر والكائن لسه في رحم امي، قولت امتنع عن الاكل، لم تأتي بفائدة، كنت اتضور جوعا وهو يمتص ما تأكله امي. ثانبها كما تحكي احدى الاساطير اني حاولت اغتياله بقلبه وهو داخل الكريكوت، بأت بالفشل برده، تم انقاذ الوغد من ايدي وكتبت له الحياه. قررت ان اتعايش مع الوضع. اتضح انه كائن لطيف مطيع لأوامري.
لقد كان عمر في مرحلة الطفولة يراني مثله الاعلى، ذكريات كتير مرت علينا، اخوات بقى، عجمي، جليم، سبورتيج، النادي، مربيلا، طريق اسكندرية القاهرة، سيدي كرير، الغردقة، شرم الشيخ، من الصعب سرد الذكريات بالتفصيل، ولكن ممكن لمحات منها معلمة في ذكارتي، تخلص بشكل عام تركيبة عمر.
طبعا من الواضح من تاريخ ميلاده انه برج الثور، يتمتع عمر بحس سهوكة مفتعلة اتجاه ماما، اذ في احدى المرات عند وصولنا الي منزلنا القديم في جليم (فاكر جليم يادودو)، افتعل عمر فجأه مرضه الشديد مع انه كان زي القرد في العربية، وأدى الدور الذي اتقن تمثيله الى الاتي، انا شايلة شنطته وشنطيي، ماما شايله عمر، طالعين 9 ادوار لان المصعد معطل، انا ورا ماما وضحكة الانتصار مرسومة على المسهوك، ماما لحد وقتنا هذا مقتنعة انه كان عيان فعلا، ويتشششش ايذذذ نوت ترووو.
في ناس كتير لما كانوا بيشفونا مع بعض وخاصة في النادي كانت الجملة المعتادة منهم انتم تؤام، نووو نوووو، انا قلت مادام وصلت لتؤام والموضوع تخطى اننا اخوات، يبقى انت من طريق وانا من طريق، وجائت مرحلة ال 5 جينه، هو 2.5 وانا 2.5، كل واحد يلعب لوحده في النادي.
قليل من يعرف شغف عمر بالنينجا ترتلز، كان يوم الاجازه ( في الصيف الموضوع ده كان كل يوم) يصحي بدري،بدري اوي، يجمعهم صف واحد لتحية العلم، ويبدأ بقى، سأقتلك ياشريدر انت واعوانك سحقا لكم جميعاااااا، انتم اغبياء يا صديقي الا تعرف ان قتلي مستحيل لقد شربت اكسير القطط هاهاها -ضحكة شريرة-، اذن سوف اقتلك مرارا وتكرار حتى يتبقى لك روح واحدة وننقض عليك بضربة واحدة ، مايكل انجلو غطيني، رونالدوا سيفك الان، رفاليلو هجججججووووم، كل ده وانا في غرفتي، وسادتي على رأسي، انفخ في الفراغ ولا يسمعني احد، وما كان علي الا ان اكون رفايلو وابدأ بالهجوم.
WWE بدات في سن مبكر لدى عمر، لا انكر اني ثقفت ذهنيا من كم المعلومات التي كان يقوم بأمدادها لي كي لا اطلب منه تغيير المحطة، وجزيل الشكر لكل من العم باتيستا، والاخ كين، والحانوتي اندرتيكر، ومحطم القلوب جون سينا.
اصحى يانايم وحد الدايم، رمضااااان كرررريم، اول مايظهر هلال رمضان، انا وعمرماليكة تحت سقف بيت واحد، يابخت ماما وبابا بينا، ربنا يحمينا وميقطعش لينا عادة ابدا، مع الساعات الاخيرة قبل انطلاق مدفع الافطار، لازم خناقة، بيكون سببها ان ماما عايزه تسمع الشيخ الشعراوي عشان تعرف تحضر الفطار، وعمر جايبب ماتش، ده كلام يا اخي الصائم، انا بكون بعاني من صداع نصفي، بروح قايمة شادة الريموت جايبة الشعراوي، بس كده خلاص، انت فاهم وانا فاهمة. مش كل الذكريات مزعجة، فيه ذكريات حلوة بس انا عايزه انكشه شويه، ده برده اخويا، مع انه بيشرب على الريق شربة برود الاعصاب بس اخويا، مع انه قبل مايصحى ماما بتكون محضرة النسكافيه بتاعه في المج بتاعه، مع العلم انا عشت 26 سنة مكنش ليا مج، مع انه قادر بمعنى قادر، يرجع من بره يصحي ماما تعمله عشا، ده بابا ميقدرش يعمل الحركة دي.
شبح أسم تم اطلاقه على عمر، حيث انه كان بامكانه ان يخرج من غرفته في اخر المنزل ويعدي من قدمنا، ويروح الحمام في اول المنزل ولا نراه، لا تذهب الى الجملة التالية قبل ان تقول سبحان الله.
في مواقف في حياتي مش حنسى وقفتك جنبي فيها، انت عارف انها لما بتضيق عليا اوي بلجألك، سواء افادتني ولا لأ، الفضفضة معاك حلوة، صحيح انت اخويا الصغير بس معرفش ليه بحسك اكبر مني، يمكن عشان اعقل مني، يمكن برودك صح، وتهوري واندفاعي غلط. صحيح انت في قارة تانية، وانا قليل لما بسأل واتكلم، مش عشان مش في بالي، انت اخويا الصغير بسنه، الكبير برازته. اشكرك لعدة اسباب، تحملك انتقادي وانا الذي كنت استحق النقض، تحملك مشاكلي مع ان في اوقات كثيرة تجاهلت مشاكلك، اشكرك لانك لم تقسو يوما علي، اشكرك لانك كنت بجانبي اوقات كثيرة عندما كانت كل تيارات المنزل ضدي، اشكرك لاني كلما ارت ان شكو امر اليك وجدت اذن صاغية، اشكرك لانك جئت الى عالمنا ولم يكن الامر كارثي فانت نعم الاخ والسند.
واخيرا حتى لا ينطفئ الجو الفكاهي في المقالة هل تعتقد ان شيرنوبل اثرت فيك ؟؟؟؟ وثانيا ،تحدي لك، انك سوف تقرأ هذه المقالة وتعمل لايك وكومنت كمان - كل سنة وانت طيب يا ابو احمد
تعليقات
إرسال تعليق